Міжнародны крэдытны рэйтынг Украіны падняўся вышэй за беларускі

• 18.08.2022, 9:46

У замежных інвестараў давер да эканомікі краіны ў вайне большы, чым да паўночнай суседкі.

Міжнародны крэдытны рэйтынг Украіны зараз вышэйшы за беларускі. І гэта пры тым, што на тэрыторыі нашай паўднёвай суседкі ідзе вайна.

Агенцтва Fitch падвысіла доўгатэрміновы крэдытны рэйтынг Украіны ў замежнай валюце з "абмежаванага дэфолту" да "магчымага дэфолту". Падвышэнне адбылося дзякуючы рэструктурызацыі замежнай пазыкі. Аналітыкі рэйтынгавага агенцтва адзначаюць нявырашаныя рызыкі яго ўстойлівасці, што з'яўляецца вынікам нападу Расеі. Яны думаюць, што вайна будзе працягвацца і ў 2023 годзе, а значыць будуць павялічвацца ўжо зараз вялізныя выдаткі на інфраструктуру і эканоміку.

Тым часам, рэйтынг Беларусі ўжо месяц на ўзроўні "абмежаваны дэфолт". Гэта азначае, што ў замежных інвестараў давер да эканомікі Украіны і да яе запазычанасцей вышэйшы, чым да беларускай.