Bild: Магутныя нямецкія гаўбіцы PzH 2000 ужо на фронце ва Украіне

• 27.06.2022, 16:38

Пасля кожнага выкарыстання гаўбіцы мяняюць пазіцыі.

Перададзеныя Украіне самаходныя нямецкія гаўбіцы PzH 2000 ужо некалькі дзён знаходзяцца на фронце. Аб гэтым піша газета Bild (пераклад - unian.net).

Адзначаецца, што журналіст газеты пабываў на перадавой ва Украіне і апублікаваў пасля гэтага матэрыял пад назвай «Нарэшце нашы самаходныя гаўбіцы ў дзеянні!».

Украінскі вайсковец распавёў карэспандэнту, што пасля кожнага ўжывання гаўбіцы змяняюць пазіцыі, каб расейцы не змаглі яе адсачыць і знішчыць.

«Гэта вельмі дасканалая зброя. Адна нямецкая самаходная гаўбіца - як тры старыя савецкія сістэмы, якія мы выкарыстоўвалі раней... Мы думалі, што авалодаем ёю за дзесяць дзён, але спатрэбілася 36», - распавёў ён.

Дзе менавіта выкарыстоўваюцца нямецкія гаўбіцы, не паведамляецца, бо гэта сакрэтная інфармацыя.

Перадаць гаўбіцы PzH 2000 Украіне пагадзіліся Нямеччына і Нідэрланды.

Даведка. САУ PzH 2000 выкананая ў стандартным для NATO калібры 155 мм і выкарыстоўвае доўгі ствол даўжынёй 55 калібраў. Такое спалучэнне цяпер прызнанае класічным і найбольш удалым і агулам дае далёкасць стрэлу звычайным набоем блізу 30 км. Але ў PzH 2000 вынікі значна лепшыя. Звычайны набой, выпушчаны з гэтай нямецкай САУ, пераадольвае ад 30 да 36 км.