Рассельгаснагляд не дае ўвозіць ялавічыну з Беларусі

• 17.09.2021, 18:13

Чарговую партыю мяса развярнулі на беларуска-расейскай мяжы.

Чарговую партыю мяса развярнулі на беларуска-расейскай мяжы ў вёсцы Лабок супрацоўнікі Рассельгаснагляду.

Паводле версіі расейскага боку, у грузавіка, які перавозіў 1 тону ялавічыны ў Невель, не было халадзільнага абсталявання, а на мясе адсутнічала маркіроўка, паведамляе прэс-служба ведамства.

«Падчас правядзення кантрольна-наглядных мерапрыемстваў дзяржаўнымі інспектарамі Упраўлення было выяўлена, што транспартаванне партыі ялавічыны ажыццяўлялася без ветэрынарных суправаджальных дакументаў і маркіроўкі (клеймаў), якія пацвярджаюць бяспеку і паходжанне мясной сыравіны, а ў транспартным сродку адсутнічала халадзільнае абсталяванне, што недапушчальна пры перавозцы і захоўванні прадукцыі, якая патрабуе захавання тэмпературнага рэжыму», - гаворыцца ў паведамленні.

Служба нагадвае, што раней былі ўведзены часовыя абмежаванні на ўвоз ялавічыны на косткі з Беларусі ў сувязі з нявызначаным статусам краіны па губкападобнай энцэфалапатыі.

Мяса вернута ў Беларусь, распачатая справа аб адміністрацыйным правапарушэнні.