Tages-Anzeiger: Кім Чэн Ын адчувае ўсё большую няўпэўненасць
- 27.06.2019, 14:15
Менавіта з гэтай прычыны кіраўнік КНДР спрабуе засяродзіць уладу ўнутры сям'і.
«Паўночнакарэйскі лідар Кім Чэн Ын, імаверна, павысіў сваю малодшую сястру Кім Ё Чжон да кіруючай пасады», - паведамляе швейцарскае выданне Tages-Anzeiger, (пераклад - inopressa.ru).
Раней Кім Ё Чжон афіцыйна з'яўлялася намесніцай аддзела прапаганды і агітацыі Працоўнай партыі Карэі і на публічных выступах свайго брата часцей за ўсё трымалася ў цені, піша журналіст Крыстоф Найдхарт. «У мінулы чацвер на масавым спектаклі для кітайскага прэзідэнта Сі Цзіньпіна яна сядзела побач з Кім Ён Чхоль, былым начальнікам контрвыведкі. (...) На думку паўднёвакарэйскай разведкі, гэта даказвае, што малодшую сястру павысілі да пасады, раўназначнай той, што займае Чхве Рон Хэ. Былы віцэ-маршал выконвае абавязкі намесніка Кіма ў «камісіі дзяржаўных спраў», якая раней звалася «вайсковай камісіяй» і якая з'яўляецца непасрэдным цэнтрам улады ў Паўночнай Карэі. Такім чынам, ён займае другі радок у паўночнакарэйскай іерархіі. Акрамя таго, з красавіка ён старшынюе ў Вярхоўным народным сходзе КНДР, што, згодна з пратаколам, робіць яго кіраўніком дзяржавы. Ён таксама з'яўляецца свёкрам Кім Ё Чжон», - гаворыцца ў артыкуле.
«Павышэнне сястры паказвае, што Кім Чэн Ын засяроджвае ўсё больш улады ўнутры сям'і, - паказвае Найдхарт. - Адначасова ён увесь час змяняе генералаў і вядучых супрацоўнікаў спецслужбаў». Такіх перастановак раней не было, адзначыў нядаўна былы намеснік паўночнакарэйскага амбасадара ў Лондане Тай Ёнг-Хо. Ён мяркуе, што ў сярэднетэрміновай перспектыве рэжым Кіма будзе заставацца стабільным і праіснуе яшчэ 10 гадоў, але не 20, паведамляе выданне. «Магчымасць вайсковага перавароту ён выключае, 200 тысяч салдат у Пхеньяне падпарадкоўваюцца не генералам, а асабістай ахове Кім Чэн Ына. Таму ні адзін генерал не зможа мабілізаваць усе структуры», - адзначаецца ў публікацыі.
«Нягледзячы на меркаваную стабільнасць, у пастаянных перастаноўках Кіма Тай бачыць сігнал няўпэўненасці. Адпаведным чынам варта трактаваць і засяроджванне ўлады ўнутры сям'і», - піша Tages-Anzeiger.