Што вы не ведалі пра новага міністра аховы здароўя
- 15.06.2019, 14:18
Цікавыя факты пра Уладзіміра Караніка.
Ураджэнец Гародні з 2011 года з'яўляўся галоўным лекарам Менскага гарадскога клінічнага анкалагічнага дыспансера. Уладзімір Каранік свядома адышоў ад працы ў аперацыйнай, бо меркаваў, што праз развязанне арганізацыйных пытанняў будзе мець недастаткова практыкі, што можа адбіцца на ягоных хірургічных здольнасцях, піша udf.by.
Павесіў на дзвярах кабінета аб'яву з нагоды дароў з боку пацыентаў
Паведамленне абвяшчала: «Уваход з торбамі і пакетамі забаронены».
У аўторак падчас прызначэння Караніка міністрам Аляксандр Лукашэнка паставіў перад ім задачу навесці парадак у сістэме аховы здароўя, каб не дапускаць карупцыйных праяў.
Актыўна размаўляе праз мабільны тэлефон, адказвае на ўсе званкі
Каранік распавядаў журналістам некалькі месяцаў таму: «Дзеля цікавасці наважыў падлічыць, колькі разоў на дзень бяру ў рукі тэлефон, каб адказаць на выклік ці самому патэлефанаваць. Калі дайшоў да сотні, кінуў гэты занятак. Свой нумар тэлефона ніколі не мяняў і не ўтойваў. Мяне знаходзяць нават пацыенты, якіх лячыў яшчэ ў РНПЦ анкалогіі і медрадыялогіі: штосьці пытаюць, удакладняюць і проста віншуюць з прафесійным святам».
Пасля прызначэння міністрам журналісты таксама змаглі датэлефанавацца да Караніка і задаць пытанні.
Уважае рак за бізун нацыі
Захворванне на анкалогію ў Беларусі з кожным годам павялічваецца. Уладзімір Каранік тлумачыць гэта не дрэннай экалогіяй або наступствамі катастрофы на Чарнобыльскай АЭС, а павелічэннем працягласці жыцця.
Лукашэнка хваліў працу дыспансера пад ягоным кіраўніцтвам
Пры тым, што захворванні на анкалогію павялічыліся, паміраць ад яе ў Менску сталі радзей. Колькасць памерлых значна не вырасла, хоць колькасць тых, хто захварэў, з 2000 года практычна падвоілася.
Паўтара гады таму Менскі анкадыспансер наведаў дыктатар.
«Ім Нобелеўскую прэмію трэба даваць, яны ўсіх тут вылечваюць», - заявіў Лукашэнка.
Можа выявіцца самым высокім міністрам
Мяркуючы з фатаграфій, Каранік прыкметна вышэйшы за Лукашэнку. Звестак аб ягоным росце ў адкрытым доступе няма, затое вядомы рост дыктатара - 1 метр 88 сантыметраў.
На просьбу пацыентаў складаў экзатычныя даведкі
Уладзімір Каранік распавядаў аб забабонах пацыентаў, пад націскам якіх ён складаў даведкі, якія іншым маглі б здацца дзіўнымі.
Мужчына з вёскі пасля аперацыі на лёгкіх папрасіў напісаць даведку, што ён не заразны для свойскіх птушак. Справа ў тым, што ягоная жонка меркавала, што ад кашлю і пляўкоў мужа дохнуць куры.
Жанчына са сферы гандлю папрасіла скласці даведку аб адсутнасці ў яе злаякаснай пухліны. Усё праз тое, што калегі асцерагаліся заразіцца і не садзіліся з ёй за адзін стол.
Прытрымліваецца пераканання, што ляжанне ў лякарні не лечыць
Пры значным росце колькасці хворых Менскі анкалагічны дыспансер сутыкнуўся з некаторымі праблемамі ў колькасці ложкавых месцаў. Галоўны лекар узяў курс на скарачэнне тэрмінаў шпіталізацыі.
«Прытрымліваемся пастулату - ложак не лечыць. Хворага чалавека трэба пакласці ў клініку, надаць яму медыцынскую дапамогу, пасля чаго, калі неабходнасць у стацыянарнай дапамозе адпадае, выпісаць на далейшае лячэнне альбо ў нашай паліклініцы, або па месцы жыхарства», - распавядаў Каранік.
Можна дапусціць, што на пасадзе міністра аховы здароўя гэты курс ён прадоўжыць у маштабах краіны.