СМІ: Трамп можа абвесціць пра ўзмацненне ваеннай прысутнасці ў Польшчы

• 15.04.2019, 12:59

Перамовы паміж Варшавай і Вашынгтонам набіраюць абароты.

Прэзідэнт ЗША Дональд Трамп можа наведаць Польшчу 1 верасня і абвесціць пра ўзмацненне амерыканскай ваеннай прысутнасці ў краіне.

Пра гэта паведамляе "Еўрапейская праўда" са спасылкай на Rzeczpospolita.

"Перамовы паміж Варшавай і Вашынгтонам набіраюць абароты. Амерыканцы сігналізавалі польскім партнёрам, што Трамп можа запрасіць Анджэя Дуду ў Белы дом у сярэдзіне чэрвеня, каб абмеркаваць разыходжанні з нагоды пашырэння амерыканскіх базаў у Польшчы", – гаворыцца ў паведамленні. Першапачаткова планавалася, што прэзідэнт Польшчы наведае ЗША ў гэты перыяд, але візіт будзе мець выключна эканамічны характар.

Калі абодва лідары дасягнуць папярэдняй дамоўленасці, перашкода для абвяшчэння Трампам у Варшаве да 80-годдзя пачатку Другой сусветнай вайны амерыканскай ваеннай ініцыятывы знікне, адзначае газета.

У канцылярыі прэзідэнта Польшчы стрымана каментуюць інфармацыю пра магчымы візіт Трампа.

"Можам пацвердзіць, што запрашэнне прэзідэнта Трампа на 1 верасня застаецца актуальным", – сказаў кіраўнік канцылярыі Кшыштаф Шчэрскі.

З нагоды пашырэння амерыканскай ваеннай прысутнасці ў Польшчы Rzeczpospolita адзначае, што гаворка можа ісці пра фармат дывізіі. Акрамя гэтага, Трамп мог бы абвесціць у Варшаве пра важныя праекты ў галіне энэргетыкі.