Беларусы, якія працуюць у Польшчы, змогуць прывозіць да сябе сваякоў

• 19.08.2018, 22:29

Працоўная міграцыя да заходніх суседзяў - тэма надзённая для Беларусі.

Мяжа карміла ва ўсе часы - калі легальна, калі не вельмі, піша «Вечерний Брест». Цяпер жа ў Польшчы плануюць змяніць некаторыя правілы знаходжання працоўных мігрантаў, якія рэгулююцца Законам аб іншаземцах і Законам аб рынку працы. Тыя, хто маюць дазвол на пражыванне і працу ў РП, праз год з лішнім пасля атрымання яго змогуць перавозіць да сябе сваякоў.

Праўда, як піша «Gazeta Prawna», разлічаны гэтыя новаўвядзенні, у асноўным, на ўкраінскіх мігрантаў, а не беларускіх. Там «безвіз», там прасцей выехаць на працу. Аднак сёння ў Польшчы таксама могуць працаваць і атрымліваць від на жыхарства грамадзяне Арменіі, Беларусі, Грузіі, Малдовы, Расеі. Польскія ўлады гатовыя прыняць да 400 тысяч імігрантаў у год. Палову з іх складуць, хутчэй за ўсё, украінцы.

«Змены накіраваны на тое, каб спрыяць аблягчэнню рассялення ў Польшчы грамадзян культурна блізкіх краін, якія маюць кваліфікацыю ў прафесіях, пажаданых для польскай эканомікі», - цытуюць законапраект польскія СМІ. Фактычна новыя правілы азначаюць, што імігрант зможа вярнуць сваю сям'ю праз паўтара года пасля прыбыцця ў Польшчу (пасля года працы над дазволам і некалькіх месяцаў на фармальнасці) і атрымаць пастаяннае знаходжанне - у спрыяльных умовах - на працягу трох гадоў. Сёння сталы від на жыхарства неабходна чакаць не менш за чатыры гады.