У Магілёве дзеці зладзілі акцыю пратэсту супраць адпраўкі трэнера ў армію

• 2.06.2018, 15:31

Выхаванцы школы алімпійскага рэзерву зладзілі пікет.

Са слязамі на вачах сустракалі Дзень абароны дзяцей выхаванцы тэніснага аддзялення школы алімпійскага рэзерву ў Магілёве. Пакрыўдзілі дзетак ваенкамы, забралі ў войска адзінага іхняга трэнера Канстанціна Цвяткова. Адпрацаваўшы ўсяго год, малады спецыяліст выправіўся ў войска, піша «Могилев.онлайн».

У выніку, калі з 1 чэрвеня пачалася чарговая змена спартыўнага лагера, высветлілася, што ўлюбёнага трэнера на месцы няма. І ўвогуле ніякага трэнера няма.

Што характэрна, ні дзеці, ні іхнія бацькі з тым, што адбываецца, не змірыліся. Бацькі звярнуліся да намесніцы старшыні гарвыканкама Алы Галушкі і загадчыка сектара спорту і турызму Дзмітрыя Лацянкова, просячы вярнуць Цвяткова дзецям. З асабістых сродкаў аплацілі нават корты і інвентар.

А дзеці выйшлі з плакатамі вось на такую кранальную акцыю пратэсту. На плакатах – «Вярніце Косцю», «Вярніце трэнера», «Нехта павінен вучыць дзяцей!». Фота даслала падпісчыца:

«Узнікае пытанне, для якіх жа выпадкаў у нашым заканадаўстве прадугледжаная служба ў рэзерве?» – абураецца яна.