Мэй паедзе ў Брусэль дамаўляцца аб мяжы з Ірландыяй
- 10.12.2018, 17:21
Пытанне мяжы было адным з трох найважнейшых у перамовах аб Brexit.
Прэм'ер-міністр Вялікай Брытаніі Тэрэза Мэй мае намер перагледзець пытанне мяжы Паўночнай Ірландыі ў яе пагадненні аб Brexit з Еўрапейскім Звязам, паведамляе «Европейская правда».
Пра гэта напісаў у Twitter малодшы міністр у дэпартаменце адукацыі Надзім Захаві.
«Тэрэза Мэй выслухала калег і адправіцца ў Брусэль, каб адхіліць ахоўнае пагадненне», - напісаў Захаві.
Пытанне мяжы паміж Паўночнай Ірландыяй і Рэспублікай Ірландыя было адным з трох найважнейшых у перамовах разам з брытанскім фінансавым унёскам у ЕЗ і правамі грамадзян ЕЗ у Брытаніі.