Сталі вядомыя падрабязнасці забароны на куплю аўтамабіляў за гатоўку
- 10.10.2018, 9:23
Як будзе дзейнічаць новы закон?
Міністэрства антыманапольнага рэгулявання і гандлю вынесла на грамадскае абмеркаванне праект прэзідэнцкага ўказа "Аб некаторых мерах для ўпарадкавання ўгод адчужэння транспартных сродкаў". Навіны могуць крыху ўскладніць працэс куплі аўтамабіля ў аўтасалонах. Як ІП, так і юрыдычныя асобы павінны будуць праводзіць разлікі, у тым ліку згодна з дамовамі камісіі, толькі ў безгатоўкавай форме, піша abw.by.
У абгрунтаванні ініцыятары законапраекта паведамляюць, што штуршком да змен паслужылі некалькі гучных спраў, звязаных з камісійнымі аўтамабілямі, у тым ліку гучныя крымінальныя справы супрацоўнікаў "АўтаКампаніСевен" і "Аўтататы". Як правіла, фігурантаў судзілі паводле арт.209 "Махлярства". Фізічная асоба, якая прадавала аўто праз гэтыя фірмы, не атрымлівала грошай за рэалізаваны аўтамабіль ці атрымлівала часткова. Часам рэалізоўваліся і новыя расейскія аўто пад выглядам б/у. Натуральна, далёка не ўсе ўгоды былі празрыстымі перад дзяржавай. Акрамя таго, з інфармацыі МУС, апошнім часам пачасціліся выпадкі збыту транспартных сродкаў з падробленымі рэгістрацыйнымі дакументамі, змененымі ідэнтыфікацыйнымі нумарамі, а таксама якія знаходзяцца ў вышуку. Безгатоўкавыя разлікі, на думку ініцыятараў законапраекта, паспрыяюць вываду з ценю ўсіх ці хаця б большасці ўгод куплі-продажу аўтамабіляў.
Праект указа прадугледжвае, што правядзенне разлікаў паміж юрыдычнымі асобамі, індывідуальнымі прадпрымальнікамі і фізічнымі асобамі, у тым ліку паводле дамовы камісіі, за адчужэнне транспартных сродкаў дапускаецца толькі ў безгатоўкавай форме. Распрацоўнікі разлічваюць, што гэтая мера дазволіць забяспечыць празрыстасць разлікаў пры продажы транспартных сродкаў і абараніць законныя правы прадаўцоў і пакупнікоў, а таксама прадухіліць факты збыту (легалізацыі) транспартных сродкаў, якія маюць крымінальнае мінулае, выключыць перадумовы для ўзнікнення спрэчак аб праве ўласнасці паміж грамадзянамі, кожны з якіх уважае сябе за добрасумленнага пакупніка.
Акрамя таго, з цяперашняй рэдакцыі ўказа прапануецца прыбраць частку пункта 1.1 "... ўгоды адчужэння фізічнымі асобамі такіх механічных транспартных сродкаў, прычэпаў да іх ці самаходных аўто юрыдычным асобам або індывідуальным прадпрымальнікам павінны ажыццяўляцца ў простай пісьмовай форме шляхам складання дамоў з улікам патрабаванняў гэтага ўказа" .
У адпаведнасці з гэтымі зменамі, калі фізасоба разлічваецца з юрыдычнай асобай або ІП за аўтамабіль, то ўсе разлікі праводзяцца праз банк, у тым ліку і паводле дамовы камісіі.