Брамнік менскага «Дынама» можа перайсці ў «Салават Юлаеў»
- 1.05.2017, 18:52
Сёння дзеянне кантракту Бэна Скрывенса з «зубрамі» скончылася.
Як паведамляе «Спорт-Экспрэс», брамнік менскага «Дынама» Бен Скрывенс можа перайсці ў уфімскі «Салават Юлаеў».
Гэтую інфармацыю не стаў зняпраўджваць генеральны дырэктар расейскай каманды Леанід Вайсфельд.
— Чуў, што Скрывенс да вас у «Салават» збіраецца.
— Усё можа быць.
— Як жа вы ўсіх легіянераў змесціце?
— Дык іх жа колькі хочаш можна мець.
— Але прыйдзецца кагосьці ў запасе ўвесь час пакідаць.
— Разбярэмся.
У мінулым сезоне Скрывенс правёў за менскае «Дынама» 60 матчаў, адбіўшы 91,6% кідкоў. Сёння яго кантракт з «зубрамі» закончыўся.
Раней гендырэктар беларускага паўнамоцнага прадстаўніка ў КХЛ Анатоль Курылец заявіў, што менчукі хочуць пакінуць канадскага галкіпера у сваім складзе.