Палякі змогуць набыць яшчэ больш лекаў за кошт дзяржавы

• 1.07.2016, 19:35

У Польшчы пачынаючы з ліпеня пашырылі спіс лекаў, выдаткі на якія часткова альбо цалкам пакрывае дзяржава.

Гэтая навіна парадавала, у першую чаргу, хворых на рассеяны склероз. Спіс лекаў папоўніўся двума інавацыйнымі прэпаратамі, якія змагаюцца з гэтай хваробай, паведамляе «Радыё Польшча».

На думку Маліны Вячорэк з аб'яднання пацыентаў, адзін з прэпаратаў «адкрывае новую эру ў лекаванні рассеянага склерозу». Гаворка ідзе пра вельмі эфектыўны і бяспечны лек у форме таблетак.

У цэлым у новы пералік лекавых сродкаў, якія кампенсуюцца дзяржавай, патрапілі 6 інавацыйных прэпаратаў. Два з іх выкарыстоўваюцца ў лекаванні рассеянага склерозу, яшчэ два – у лекаванні меланомы. У спісе таксама апынуліся прэпараты, якія дапамогуць змагацца з вострым лімфабластавым лейкозам і ракам малочнай залозы.

Наступныя змены ў спісе льготных лекаў з'явяцца ўжо ў верасні. Тады ж пачне дзейнічаць пералік бясплатных лекаў для пенсіянераў.