Парашэнка пасмяротна ўзнагародзіў Нямцова ордэнам Свабоды

• 3.03.2015, 12:10

Барыса Нямцова ўзнагародзілі вышэйшым ордэнам Украіны, якім могуць быць узнагароджаныя замежнікі.

Прэзідэнт Украіны Пятро Парашэнка ўзнагародзіў ордэнам Свабоды расейскага палітыка і дзяржаўнага дзеяча Барыса Нямцова, забітага ў цэнтры Масквы 27 лютага, паведамілі charter97.org у прэс-службе кіраўніка Украіны.

"Для нас, украінцаў, Барыс назаўжды застанецца патрыётам Расеі і сябрам Украіны. Ён сваім жыццём давёў, што гэта можна злучыць - трэба толькі захацець", - адзначыў Парашэнка.

Са слоў кіраўніка дзяржавы, Нямцоў змагаўся за свабоду Украіны і за свабоду Расеі, паколькі разумеў, што без свабоднай Украіны не можа быць і свабоднай Расеі. "За нашу і вашу свабоду" - гэты гістарычны лозунг стаў жыццёвым дэвізам Барыса Нямцова. Таму я пастанавіў узнагародзіць яго ордэнам Свабоды. Светлая памяць", - сказаў Парашэнка.

Ордэн Свабоды - дзяржаўная ўзнагарода Украіны для адрознення выбітных і асаблівых заслуг грамадзян у зацвярджэнні суверэнітэту і незалежнасці Украіны, кансалідацыі ўкраінскага грамадства, развіцці дэмакратыі, сацыяльна-эканамічных і палітычных рэформаў, адстойванні канстытуцыйных правоў і свабод чалавека і грамадзяніна.

Ордэн Свабоды з'яўляецца адной з вышэйшых узнагарод Украіны і вышэйшым ордэнам Украіны, якім могуць быць узнагароджаныя замежнікі і асобы без грамадзянства (для грамадзян Украіны вышэйшай узнагародай з'яўляецца званне Герой Украіны з уручэннем ордэна "Залатая Зорка" ці Ордэн Дзяржавы).