Касірка менскага банка выдала кліенту лішнія 45 мільёнаў

• 23.02.2015, 17:09

Прадстаўнікі службы бяспекі банка звярнуліся ў міліцыю з просьбай дапамагчы знайсці кліента, якому касірка памылкова выдала 45 млн рублёў.

Пра гэта сайту charter97.org паведамілі ў прэс-службе ГУУС Менгарвыканкаму.

Інцыдэнт меў месца ўдзень 30 студзеня. У касу банка зайшоў мужчына з мэтай абмену 5500 даляраў ЗША на беларускія рублі. Касірка, здзяйсняючы валютна-абменную аперацыю, памылілася, у выніку чаго перадала кліенту на 45 млн беларускіх рублёў больш, чым патрэбна.

Справа ў тым, што падчас разліку касірка замест 5 млн рублёў памылкова перадала кліенту 50 млн рублёў. У сваю чаргу мужчына, які ладзіў абмен, не пералічыўшы атрыманых сум, паклаў купюры ў партфель і пакінуў аддзяленне банка.

Нястача выявілася праз некалькі гадзін.

З заявай аб дапамозе ў вышуку кліента ў Маскоўскае РУУС звярнуліся прадстаўнікі службы бяспекі банка. Наяўная камера відэаназірання зафіксавала мужчыну, якому памылкова выдалі лішнюю суму.

Работнікі банка просяць кліента вярнуць перададзеныя па памылцы касіркі грашовыя сродкі. Просяць адгукнуцца і тых, хто можа дапамагчы ў высвятленні асобы зафіксаванага на відэа мужчыны. За інфармацыю пра яго банк гарантуе ўзнагароджанне.