«Чарнобыльская малітва» - у варшаўскім тэатры «Studio»
- 5.03.2013, 20:09
У пятніцу ў варшаўскім тэатры «Studio» адбудзецца прэм'ера спектакля «Чарнобыльская малітва» па кнізе Святланы Алексіевіч.
Сёння ў тэатры адбылася адкрытая рэпетыцыя, за якой маглі назіраць прадстаўнікі СМІ. Рэжысёр спектакля Іана Шчапкоўска сказала «Радыё Свабода»:
«Я хачу паказаць менавіта сілу жыцця гэтых людзей, нават больш, чым страшныя знішчэнні, якія Чарнобыль прынёс, бо пра гэта мы ведаем. А тым часам многія людзі і нават прырода спрабуюць неяк з гэтым справіцца, вяртаючыся ў пэўным сэнсе да вытокаў.
Людзі пачынаюць заўважаць зусім іншыя каштоўнасці, адрозныя ад тых, якімі мы жывем цяпер. Я хачу расказаць пра стваральную сілу нават ва ўмовах апакаліпсісу, сілу людзей, якія туды вярнуліся...
Складаней было растлумачыць маладым акцёрам, як было ў тыя часы. Людзі, якія жывуць у свабоднай краіне, нават рухаюцца і размаўляюць інакш. Я памятаю тыя часы і ведаю, як, напрыклад, тады размаўлялі па тэлефоне з начальствам. Трэба памятаць пра ўсеагульны страх, свядомасць канкрэтнага рабства. Вельмі цяжка было растлумачыць, як гэта - не адчуваць сябе свабодным».
У сакавіку «Чарнобыльскую малітву» ў варшаўскім тэатры пакажуць 6 разоў.