Пракаповіч пайшоў на саступкі прадпрымальнікам
- 20.12.2013, 18:40
Улады адклалі ўвядзенне суправаджальных дакументаў на тавар для ІП.
Пра гэта сайту charter97.org паведаміў кіраўнік грамадскага аб'яднання «Перспектыва» Анатоль Шумчанка.
«Паводле нашай інфармацыі, для прадпрымальнікаў з 1 студзеня ніякіх зменаў у суправаджальных дакументах не будзе. На сённяшні дзень гэтае пытанне адкладзена да 1 ліпеня 2014 года, як і пытанне паводле сертыфікатаў. Гэта значыць сертыфікаты, якія беларускія ўлады хацелі ўвесці з 1 снежня, не ўвялі, і засталася ў дзеянні пастанова, якая была да 1 ліпеня 2014 года. Што тычыцца змяненняў ва Указ №285 паводле часткі наяўнасці суправаджальных дакументаў, то на гэты конт ніякіх зменаў з 1 студзеня не плануецца, а прадпрымальнікі будуць працаваць на ранейшых умовах, гэта значыць плаціць адзіны падатак і працаваць без дакументаў. Ёсць праект указа, які плануюць падпісаць 1 ліпеня, аб увядзенні суправаджальных дакументаў з 1 студзеня 2015 года. Пакуль гэта толькі планы, але я спадзяюся, што ім не наканавана спраўдзіцца, і мы будзем працаваць па-старому», - сказаў адзін з лідараў прадпрымальніцкага руху.
Анатоль Шумчанка дадаў, што яго ўключылі ў рабочую групу, сфармаваную пры ўрадзе.
«Таму вынік пакуль такі, і добра, што мы новы год сустрэнем без тых клопатаў, якія былі ў лістападзе месяцы пасля заяваў Пракаповіча. Так што вялікі дзякуй сайту charter97.org, які нам вельмі моцна дапамог, і наогул усім журналістам, бо мы зрабілі вельмі вялікую справу», - заявіў старшыня «Перспектывы».
Нагадаем, з пачатку гэтага месяца, са слоў Пятра Пракаповіча, для прадпрымальнікаў павінен быў уступіць у дзеянне тэхрэгламент Мытнага саюза. 31 кастрычніка віцэ-прэм'ер заявіў, што з 1 снежня 2013 года індывідуальныя прадпрымальнікі не змогуць прадаваць тавары, якія не маюць дакументаў, што пацвярджаюць іх якасць і бяспеку ў адпаведнасці з патрабаваннямі тэхнічнага рэгламенту МС «Аб бяспецы прадукцыі лёгкай прамысловасці»
Пачынаючы з 1 лістапада на рынках Беларусі пад рознымі падставамі пачаліся ўзмоцненыя праверкі, якія суправаджаліся канфіскацыяй тавараў. Пазней менскія ўлады сарвалі правядзенне 25 лістапада форуму прадпрымальнікаў, на якім ІП збіраліся абмеркаваць сітуацыю, звязаную з увядзеннем у наступным месяцы новых правілаў гандлю.