Алег Трусаў: Любая нацыя павінна стварыць універсітэт

• 31.10.2018, 22:56

Мець нацыянальны ўніверсітэт – надзвычай важна.

У сядзібе Баранавіцкага Таварыства беларускай мовы ў Русінах адбылася прэзентацыя беларускага Універсітэта імя Ніла Гілевіча.

Прысутных на сустрэчы кіраўніцтва ўніверсітэта пазнаёміла з планамі і праектамі новай нацыянальнай установы, паведамляе «Радыё Рацыя».

Выконваючы абавязкі рэктара ўніверсітэта Алег Трусаў расказаў пра набор на курсы, дзе навучанне па самай мінімальнай цане: за 72 гадзіны – 200 беларускіх рублёў, а навучацца могуць людзі розных узростаў. Вывучаць беларускую, англійскую, нямецкую і польскую мовы, а таксама фізіку, хімію, матэматыку і гісторыю Беларусі.

Універсітэт арыентуецца на найноўшыя стандарты ў галіне адукацыі менавіта еўрапейскага і міжнароднага досведу. Мець нацыянальны ўніверсітэт – надзвычай важна, кажа Алег Трусаў:

– Любая нацыя павінна стварыць універсітэт. Што зрабілі айцы БНР? Заявілі, што ёсць універсітэт і абралі аргкамітэт на чале з акадэмікам Карскім. Але не атрымалася. Потым было прынята рашэнне пра беларусізацыю БДУ. Да 1929 года большасць прадметаў у БДУ было па-беларуску. Перастралялі выкладчыкаў, але беларусы ўсё роўна ідуць і ідуць да мэты.

Паводле Алега Трусава, 20 год таму з заклікам адкрыць беларускі ўніверсітэт да ўладаў звярнуліся 55 тысяч беларусаў. Далей абяцанняў адкрыць такую ўстанову справа не пайшла. Таму было вырашана стварыць прыватны ўніверсітэт, і ён ужо зарэгістраваны. Далейшае яго станаўленне залежыць не толькі ад ініцыятараў, але і ад усяго грамадства.