Беларускую арфаграфію можна праверыць анлайн

• 2.01.2014, 10:41

У сервісе праверкі арфаграфіі і стылю LanguageTool стала даступная беларуская мова.

Яна з'явілася ў версіі праграмы 2.4. Каб праверыць правільнасць набранага тэксту, трэба адкрыць сайт LanguageTool, абраць унізе вакна беларускую мову і ўставіць тэкст.

Выглядае на тое, што пакуль праграма правярае ў беларускім тэксце толькі арфаграфію, бо памылак стылю не бачыць зусім, адзначае «Наша Ніва».

Слоўнік праграмы ўключае ў сябе словы на «наркамаўцы», таму словы, напісаныя на «тарашкевіцы», пазначаюцца як памылковыя.

LanguageTool 2.4 існуе як анлайн-сервіс, а таксама як асобная праграма і як дадатак да браўзэра Mozilla.