Змеі абляпілі набярэжную ў Пінску

• 8.04.2024, 21:02

Звісаюць нават з дрэваў.

Набярэжная Пінска ў красавіку акупаваная змеямі. Відэа гэтай з'явы апублікавала адна з мясцовых жыхарак у TikTok. На кадрах відаць, што па туях, высаджаных уздоўж ракі ў вялікай колькасці поўзаюць змеі, паведамляе «Люстэрка».

Паводле словаў аўтаркі роліка, вужы, якія выпаўзаюць грэцца на сонейку вясной у Пінску, – гэта звычайная з'ява, але сёлета іх занадта шмат, прычым настолькі, што яны вісяць нават на дрэвах. Пры гэтым яна адзначыла, што, акрамя вужоў, па набярэжнай поўзаюць і атрутныя змеі.

«Дый гадзюкі таксама ёсць, пісалі папярэджанні», – паведаміла яна ў каментарах, кантактуючы з падпісчыкамі.

Некаторыя карыстальнікі ў каментарах выказалі непакой, што няпрошаныя госці маглі забрацца ўжо і ў агароды. Іншыя паспяшаліся супакоіць: такое можна ўбачыць толькі побач з вадаёмамі, у агародах вужоў быць не павінна.

Дадамо, што ў Пінску падобнае «нашэсце вужоў» ужо было ў красавіку 2019 і 2021-га. Тады яны занялі тэрыторыю не толькі набярэжнай, але і гарадскога парку.