Жыхару Смаргонскага раёна суд забараніў выдаткоўваць пенсію

• 27.04.2024, 21:16

У чым прычына?

У памяшканні Сінькоўскага «сельскага выканкама» прайшло выязное судовае грамадзянскае пасяджэнне. Пракурор раёна падаў пазоў аб прызнанні мясцовага жыхара абмежавана дзеяздольным.

Як паведамляе Генпракуратура, прычына ў тым, што 67-гадовы мужчына выдаткоўваў пенсію на алкаголь. Пры гэтым утрымліваў сям'ю, набываў прадукты, лекі і аплачваў камуналку ягоны сын. У выніку сям'я трапіла ў цяжкое матэрыяльнае становішча.

Прыхільнасць мужчыны да алкаголю пацвердзілі сваякі.

Пастановай суда Смаргонскага раёна заяву пракурора задаволілі ў поўным аб'ёме. Цяпер мужчына абмежаваны ў дзеяздольнасці, яму забаронена здзяйсняць угоды, за выключэннем дробных побытавых, а таксама атрымліваць пенсію, заробак і іншыя прыбыткі і распараджацца імі без згоды апекуна.