Галоўны камандзір УСУ: Сітуацыя на фронце складаная, з тэндэнцыяй да абвастрэння

• 27.04.2024, 19:52

Сырскі нагадаў краінам-партнёркам пра важнасць тэрміновага вылучэння новай зброі.

Сітуацыя на фронце складаная і мае тэндэнцыю да абвастрэння. Пра гэта заявіў галоўны камандзір Узброеных сілаў Украіны Аляксандр Сырскі на пасяджэнні Кантактнай групы ў пытаннях абароназдольнасці Украіны («фармат Рамштайн»).

– Я (...) праінфармаваў удзельнікаў кааліцыі пра складаную аператыўна-стратэгічную абстаноўку, якая мае тэндэнцыю да абвастрэння, –паведаміў Сырскі ў сваім тэлеграм-канале.

Паводле ягоных словаў, партнёрам Украіны растлумачылі спецыфіку расейскіх авіяўдараў па аб'ектах энэргетычнай інфраструктуры, а таксама пра надзённыя патрэбы Украіны ў ракетах, боепрыпасах, узбраенні і ваеннай тэхніцы.

Сярод іншага камандзір УСУ адзначыў, што своечасовае паступленне ўзбраенняў ва Украіну мае ключавое значэнне.