Данія вылучыць амаль 600 мільёнаў еўраў на ваенную дапамогу Украіне

• 25.04.2024, 21:29

Урад Даніі і парламенцкія партыі дасягнулі дамоўленасці.

Улады Даніі прынялі пастанову павялічыць фінансаванне Украінскага фонду, у рамках якога Украіне перадаюць ваенную дапамогу на 590 мільёнаў еўраў.

Пра гэта паведамляе прэс-служба Мінабароны Даніі.

Ва ўстанове ўдакладнілі, што большая частка сродкаў, якія вылучыла Данія для дапамогі Украіне на 2024 год, ужо заканчвалася. Аднак існавала неабходнасць у далейшай значнай ваеннай падтрымцы Украіны сёлета.

У сувязі з гэтым урад Даніі і парламенцкія партыі дасягнулі дамоўленасці, каб вылучыць дадатковыя 590 млн еўраў на 2024 год.

Гаворка ідзе пра Украінскі фонд. Ён прадугледжвае вылучэнне Украіне прамой ваеннай дапамогі ў выглядзе ўзбраенняў, іншага ваеннага абсталявання і намаганні ў навучанні. Сярод іншага, для УСУ набываюць зброю і абсталяванне ў дацкіх і замежных кампаній.

Таксама прадстаўнікі ўраду і парламента Даніі дапускаюць прамое набыццё ва ўкраінскай прамысловасці пры ўмове механізмаў кантролю.

Раней Украіна і Данія заключылі Мемарандум аб узаемаразуменні датычна доўгатэрміновага супрацоўніцтва і аднаўлення Украіны.