Даляр ішоў на рэкорд, але ўсё змянілася

• 22.04.2024, 9:23

Якіх курсаў зараз чакаць на гэтым тыдні?

Нягледзячы на актыўны рост курсу даляра ЗША ў першай палове мінулага тыдня, вынік для беларускага рубля быў станоўчым. Больш за тое, увесь валютны кошык Нацбанка Беларусі ўмацаваўся па выніках мінулага тыдня на -0,17%, і адставанне з пачатку года скарацілася да +1,45%, піша myfin.by.

Гэты тыдзень вольны ад важных эканамічных навін, інфармацыйны фон будзе фармавацца бягучымі падзеямі.

На расейскім фінансавым рынку пачынаецца падатковы тыдзень, і гэты чыннік можа дапамагчы расейскаму рублю. Цалкам дапушчальна ўмацаванне абменнага курсу даляра на маскоўскіх таргах да USD/RUB 92,00. Акрамя таго, нядрэнная гісторыя склалася з прафіцытам дзяржаўнага бюджэту Расеі па выніках сакавіка 2024 года, што таксама падтрымае расейскі рубель.

З улікам сказанага можна чакаць вяртання абменнага курсу даляра ЗША на беларускіх валютных таргах да ўзроўню USD/BYN 3,2500, расейскі рубель мае шанец падняцца ў кошце да RUB/BYN 3,5000 за 100 расейскіх рублёў.