Данія аддае Украіне ўвесь свой парк F-16

• 22.04.2024, 13:04

Названы тэрміны.

Капенгаген аддае Украіне ўсе свае знішчальнікі F-16, яны павінны быць ва Украіне гэтым летам, заявіў пасол Даніі ва Украіне Олі Эгбэрг Мікельсэн.

У інтэрв'ю «Мы - Украіна» дыпламата спыталі, ці варта Украіне хвалявацца з-за нядаўняй навіны аб продажы Даніяй Аргентыне 24 знішчальнікаў гэтага тыпу. «Не хвалюйцеся, самалёты для Украіны сапраўды будуць. Гэта ўвесь наш парк F-16, які зараз выводзіцца з эксплуатацыі, таму што мы атрымліваем новае пакаленне самалётаў F-35», - сказаў Мікельсэн.

Паводле ягоных слоў, частку знішчальнікаў даставяць у Аргентыну, аднак Украіна атрымае тую колькасць, пра якія было дамоўлена. «Няма чаго хвалявацца. F-16 будуць дастаўленыя, як і абяцалі», - падкрэсліў ён.

Летам мінулага года прэм'ер-міністр краіны Метэ Фрэдэрыксен абвясціла, што яны перададуць украінскаму войску 19 амерыканскіх знішчальнікаў F-16.