У Пінску легкавік збіў на пераходзе маці з сямігадовай дачкой

• 7.03.2024, 21:17

Жанчына некалькі метраў праехала на капоце.

Легкавік збіў маці з дзіцем на пешаходным пераходзе ў Пінску, паведамілі ў ДАІ.

ДТЗ адбылося 6 сакавіка блізу 16.50. Пінчук на Volkswagen ехаў па праспекце Жаўтоўскага. Перакрыжаванне з вуліцай Сонечнай ён праязджаў на забараняльны сігнал святлафора.

У гэты момант пешаходны пераход таксама на забараняльны сігнал святлафора перасякала 35-гадовая жыхарка горада са сваёй сямігадовай дачкой, піша BrestCity.

Мяркуючы з відэа, яны выбеглі на дарогу з-за стаялага аўтобуса. Аўтамабіль на высокай хуткасці збіў пешаходаў. Дзіця адкінула ў бок, а жанчыну Volkswagen некалькі метраў правёз на капоце.

У выніку ДТЗ пешаходы шпіталізаваныя. Праводзіцца праверка.