Літва заклікала ЕЗ абмежаваць імпарт прадуктаў харчавання з Беларусі

• 27.03.2024, 18:44

Раней краіна ўзмацніла кантроль за імпартаваным зернем.

Еўрапейская камісія павінна ўжыць больш строгія захады для абмежавання імпарту прадуктаў харчавання расейскага і беларускага паходжання на рынак ЕЗ.

Пра гэта заявіў намеснік міністра сельскай гаспадаркі Літвы Вітаўтас Абукаўскас, паведамляе Delfi.

«Літва ўжо ўзмацніла кантроль за збожжам, імпартаваным з Расеі і іншых краін высокай рызыкі, - правяраецца кожны вагон або транспартны сродак, які ўвозіць прадукцыю - як збожжа, прызначанае для літоўскага рынку, так і збожжа, якое экспартуецца праз Клайпедскі порт», - сказаў ён.

Чыноўнік дадаў, што неабходна дзейнічаць разам, бо пастановы асобных краін ЕЗ у абмежаванні імпарту не дадуць жаданага выніку, бо імпарт прадуктаў харчавання, напрыклад, збажыны, свабодна даступны ў іншыя краіны Еўразвязу.

Намеснік міністра таксама вітаў прапанову Еўракамісіі павысіць падаткі, якія будуць ужывацца да збожжа, насення алейных культур і прадуктаў з іх, што імпартуюцца з Расеі і Беларусі, але разам з тым падкрэсліў, што маштаб праблемы нашмат большы.