Краіны Паўночнай Еўропы выступілі супраць удзелу беларусаў у міжнародных спаборніцтвах
- 5.09.2023, 17:57
Пастанова была прынятая на кангрэсе ў Грэнландыі.
Алімпійскі і Паралімпійскі камітэты Паўночных краін, а таксама нацыянальныя спартовыя федэрацыі Паўночных краін зноў заявілі аб сваёй нязгодзе з допускам беларускіх і расейскіх спартоўцаў да ўдзелу ў міжнародных спаборніцтвах.
«Сітуацыя з вайной ва Украіне не змянілася.
Таму мы цвёрда стаім на сваёй пазіцыі не дапусціць удзелу расейскіх і беларускіх спартоўцаў і афіцыйных асоб у міжнародным спорце.
Цяпер непрыдатны час думаць аб іх вяртанні, гэта наша пазіцыя.
Мы, Алімпійскі і Паралімпійскі камітэты Паўночных краін і спартыўныя канфедэрацыі, карыстаемся гэтай магчымасцю, каб яшчэ раз пацвердзіць нашу цвёрдую падтрымку ўкраінскага народа і патрабаванні міру.
Алімпійскі і Паралімпійскі камітэты Паўночных краін, а таксама спартовыя канфедэрацыі будуць працаваць разам і ў цесным дыялогу з адпаведнымі зацікаўленымі бакамі працягваць уважліва ацэньваць і адсочваць сітуацыю», - гаворыцца ў заяве.
Такое паведамленне ў выніку сустрэчы ў Грэнландыі накіравалі ў Міжнародны алімпійскі камітэт (МАК), Еўрапейскі алімпійскі камітэт (ЕАК), Асацыяцыю алімпійскіх камітэтаў (АНАК), Міжнародны паралімпійскі камітэт (МПК) і Еўрапейскім паралімпійскім камітэтам (ЕПК).
Нагадаем, што многія беларускія каманды і спартоўцы былі адхіленыя ад міжнародных спаборніцтваў у адказ на вайну, якая працягваецца Расеяй ва Украіне з 24 лютага 2022 года з выкарыстаннем тэрыторыі Беларусі.