Нацыянальная каманда Беларусі ў футболе згуляе сёння з Ізраілем у адборы Еўра-2024
- 12.09.2023, 18:13
Матч пачнецца а 21.45 у Тэль-Авіве.
12 верасня а 21.45 у Тэль-Авіве пачнецца кваліфікацыйны матч чэмпіянату Еўропы ў футболе, у якім сустрэнуцца нацыянальныя каманды Ізраіля і Беларусі.
У адборачнай групе з 6 каманд беларусы займаюць 4 месца, набраўшы ў 5 матчах 4 балы: тры паражэнні пры адной перамозе і нічыёй.
У Ізраіля - трэцяе месца і 8 балаў. Лідаруе Швэйцарыя - 11 балаў, а на другім месцы Румынія - 9.
Новы галоўны трэнер беларускай нацыянальнай каманды гішпанец Карлас Алас Ферэр заявіў напярэдадні матчу, што яго каманда прыехала ў Ізраіль па перамогу, а не адбываць нумар.