Беларус Протас закінуў і зрабіў «асіст» у трэцім матчы паўфінальнай сэрыі Кубка Колдэра

• 28.05.2023, 16:35

Хакеіст у сёлетнім спаборніцтве плэй-оф АХЛ згуляў у 10 матчах і набраў 9 балаў.

Беларускі форвард Аляксей Протас закінуў і зрабіў "асіст" у трэцім матчы паўфінальнай сэрыі Кубка Колдэра. Пры гэтым "Хершы" выйшаў наперад у сэрыі супраць "Рочастэра".

"Хершы" ў гасцях перамог "Рочастэр" — 4:2 (1:0, 2:1, 1:1).

Аляксей Протас вызначыўся перадачай пры першым узяцці брамы, а затым паставіў кропку ў сустрэчы, закінуўшы чацвёртую шайбу на апошняй хвіліне трэцяга перыяду. Таксама ён выканаў два кідкі і закончыў сустрэчу з паказчыкам карыснасці "+2".

Пасля трох сустрэч паўфінальнай сэрыі Кубка Колдэра (да чатырох перамог) "Хершы" выйшаў наперад — 2-1 (1:5, 2:0, 4:2). Наступных матч пройдзе на лёдзе "Рочастэра" (29 траўня).

Аляксей Протас у цяперашнім спаборніцтве плэй-оф згуляў у 10 матчах і набраў 9 (4+5) балаў пры паказчыку карыснасці "+6", адзначае афіцыйны сайт АХЛ.