Сядзіба Зяленскага заклікала краіны Рады бяспекі ААН байкатаваць пасяджэнні пад старшынствам РФ

• 1.04.2023, 21:38

Расея, сама меней, мае быць пазбаўленая прысутнасці ў ААН.

Краіны-чальцы Рады бяспекі ААН маюць байкатаваць на працягу красавіка ўсякія пасяджэнні пад эгідай Расеі. Дзяржава-тэрарыст, якая парушае статут, мае быць пазбаўленая прысутнасці ў ААН.

Пра гэта паведамляе РБК-Украіна са спасылкай на заяву дарадцы кіраўніка Сядзібы прэзідэнта Украіны Міхайлу Падаляка.

- Гэта не проста жарт. Гэта пэўныя юрыдычныя дзеянні. Гэта не жарт, гэта злом глабальнай сістэмы як такой... Мы гаворым сёння пра краіну, якая парушае артыкул 4 статута ААН, ключавы артыкул, базавы. Не можа дзяржава-сябра ААН пачынаць вайну без мандата ААН, - сказаў Падаляк.

Дарадца адзначыў, што Расея парушае статут, і сама меней мае быць пазбаўленая прысутнасці ў ААН.

- Таму мне здаецца, што краіны-сябры Рады бяспекі маюць гаварыць не пра жарт, а байкатаваць на працягу красавіка ўсякія пасяджэнні пад эгідай РФ, гэта значыць, не прыходзіць на гэтыя пасяджэнні... Гэта адзіны механізм, каб паставіць кропку ў гэтым нонсэнсе, - падкрэсліў Падаляк.

Нагадаем, Расея на працягу красавіка 2023 года будзе старшыняваць у Радзе Бяспекі ААН. Паводле ўмоў ратацыі яна зменіць Мазамбік.