Пуцін абвясціў новую Канцэпцыю замежнай палітыкі Расеі
- 31.03.2023, 18:21
У канцэпцыі абазначаныя прынцыпы, задачы і прыярытэты дыпламатычнай дзейнасці Расеі.
Прэзідэнт Расеі Уладзімір Пуцін 31 сакавіка зацвердзіў новую Канцэпцыю замежнай палітыкі краіны, паведамляе прэс-служба Крамля.
Пуцін пракаментаваў, што абнаўленне Канцэпцыі замежнай палітыкі Расеі спатрэбілася праз «кардынальныя змены ў міжнародным жыцці». У канцэпцыі абазначаныя прынцыпы, задачы і прыярытэты дыпламатычнай дзейнасці Расеі.
Паведамляецца, што распрацоўкай дакумента займаліся МЗС, адміністрацыя прэзідэнта Расеі, Савет бяспекі, а таксама ўрад і іншыя міністэрствы і структуры.
У сваю чаргу галоўныя палажэнні абноўленай канцэпцыі расказаў кіраўнік расейскай дыпламатыі Сяргей Лаўроў. Ён растлумачыў, што ў дакуменце выкладзенае бачанне Расеяй прынцыпаў больш збалансаванага і справядлівага светаўладкавання. Тут ён пералічыў: поліцэнтрычнасць, суверэнную роўнасць дзяржаў, забеспячэнне іх права выбіраць мадэлі развіцця, абарону культурна-цывілізацыйнай разнастайнасці свету.
Таму рамачнай задачай усіх накірункаў замежнай палітыкі Расеі ён назваў садзейнічанне станаўленню шматпалярнага светапарадку. Яшчэ акцэнт зроблены на неабходнасць забяспечваць законнасць у міжнародных стасунках. А падыход да працы ў ААН сфакусаваны на павышэнні эфектыўнасці арганізацыі і «перапацвярджэнні фундаментальных мэт і прынцыпаў» яе статута і г.д.
Акрамя таго, Лаўроў назваў ЗША «галоўным правадніком антырасейскай лініі».