Украінскі генерал Маламуж: Расея губляе асноўныя прафесійныя падраздзяленні

• 28.03.2023, 16:35

УСУ рыхтуюцца да маштабных наступальных аперацый.

Кіраўнік Службы замежнай выведкі Украіны 2005-2010 гадоў генерал арміі Мікалай Маламуж адзначыў «Эспрэса», што вораг кінуў амаль усе рэсурсы, але прасунуцца не можа.

- УСУ маюць стратэгічную ініцыятыву, якая звязаная з тым, што вораг губляе асноўныя прафесійныя падраздзяленні. Гэта ПВК «Вагнера», паветрана-дэсантныя войскі, дэсантна-штурмавыя брыгады і марская пяхота. У нас ёсць план іх знішчэння на полі бою. Для гэтага ў нас ёсць рэзервы, падрыхтаваныя спецпадраздзяленні, тэхніка, узбраенне, якое атрымліваем штодзень, - адзначыў Маламуж.

Са слоў генерала, Украіна мае перспектыву пераўзбраення спецпадраздзяленняў, брыгад хуткага рэагавання і брыгад прарыву, што дазваляе падрыхтавацца да маштабных наступальных аперацый.

- Задача нумар адзін - гэта выбіваць ворага, знішчаць варожыя рэзервы і перадавыя часткі, якія выконваюць агрэсіўную задачу на нашай тэрыторыі. Надышоў кульмінацыйны момант, калі вораг кінуў усё, што мае, але рушыць наперад не можа, - дадаў Маламуж.