Ва Украіне арыштавалі маёмасць галоўнага ахоўніка Януковіча

• 20.03.2023, 16:47

Уласнасць ацанілі амаль на 1,5 мільёна даляраў.

Ва Украіне арыштавалі маёмасць кіраўніка аховы збеглага прэзідэнта Віктара Януковіча, паведамляе тэлеграм-канал СБУ.

Гаворка ідзе аб актывах на 50 млн грн (амаль 1,5 мільёна даляраў), у тым ліку аб гатэлі ў Букавелі, зямлі ў Кіеве і Крыме, а таксама калекцыйнай зброі.

«Паводле матэрыялаў Службы бяспекі накладзены арышт на ўсю маёмасць кіраўніка аховы прэзідэнта-ўцекача Віктара Януковіча.

Вырак суда тычыцца элітнага гатэльнага комплексу ў Букавелі агульнай плошчай, большай за 1,2 тыс. м2, кватэры ў цэнтральным раёне Кіева агульнай плошчай больш за 200 м2, двух паркамесцаў у сталіцы, 5 зямельных надзелаў агульнай плошчай, большай за 1 га, размешчаных у сталічным рэгіёне, а таксама у Ялце і Івана-Франкоўскай вобласці. Агульны кошт арыштаваных актываў складае амаль 50 млн грн», - гаворыцца ў паведамленні.

Таксама падчас ператрусу праваахоўнікі знайшлі ў кватэры былога ахоўніка 13 адзінак зброі, у тым ліку калекцыйнай, больш за 5,6 тысячы патронаў, мабільныя тэлефоны, кампутары, дакументы і чарнавыя запісы з довадамі супрацьпраўнай дзейнасці.

Цяпер правяраецца дачыненне іх уладальніка да фінансавання расейскіх акупацыйных груповак у вайне супраць Украіны.