У спісах выбарцаў Гомельскай вобласці знойдзеныя «мёртвыя душы»
- 27.10.2023, 10:22
Цэнтрвыбаркам выдаў дзіўную інфармацыю.
Беларуская цэнтральная выбарчая камісія апублікавала інфармацыю аб выбарчых акругах, сфармаваных для будучых парламенцкіх выбараў, з пазначэннем колькасці выбаршчыкаў. "Флагшток" прааналізаваў, як змянілася колькасць выбаршчыкаў у Гомельскай вобласці ў параўнанні з аналагічнай выбарчай кампаніяй 2019 года.
У Гомельскай вобласці, як і ў папярэднюю электаральную кампанію, будзе 17 выбарчых акруг. Аднак змяніліся межы акруг, што ўскладняе параўнанне колькасці выбаршчыкаў у розных раёнах Гомельскай вобласці.
Для параўнальнасці звестак «Флагшток» аб'яднаў выбарчыя акругі ў дзве групы: Гомельскую і прадмесце (уключае Гомельскі і Добрушскі раён) і раёны Гомельскай вобласці (уключае ўсе астатнія раёны вобласці). У параўнанні з выбарчай кампаніяй 2019 года паміж гэтымі групамі адбыліся мінімальныя змены — два сельсаветы Гомельскага раёна былі далучаныя да іншых акруг.
Колькасць выбаршчыкаў у Гомельскай вобласці ў 2019 і 2023 гадах паводле звестак ЦВК, чалавек
Параўнанне спісаў паказвае, што за мінулыя чатыры гады колькасць выбаршчыкаў Гомельскай вобласці скарацілася на 30,5 тысячы чалавек (-3%). Прычым у абласным цэнтры і прадмесці скарачэнне электарату больш значнае, чым у рэгіёнах. Калі колькасць выбаршчыкаў у раёнах скарацілася толькі на 2%, то ў Гомелі і яго наваколлі — на 4%.
Звесткі аб змене колькасці выбаршчыкаў ідуць насуперак дэмаграфічнай статыстыцы Белстата, якая сведчыць аб тым, што насельніцтва Гомеля скарачаецца меншымі тэмпамі, чым у рэгіёнах. У выніку назіраюцца цяжка вытлумачальныя дэмаграфічныя метамарфозы. Калі ў Гомелі і прадмесці ўдзельная вага насельніцтва, якое валодае выбарчым правам, істотна скарацілася, то ў рэгіёнах, наадварот, вырасла.
Дзель насельніцтва Гомельскай вобласці, уключанага ў спіс выбаршчыкаў, у 2019 і 2023 гадах, %
Калі ў абласным цэнтры не ўключаны ў выбарчыя спісы кожны чацвёрты жыхар (уключаныя 75,6%), то ў іншых рэгіёнах вобласці доля электарату складае 82%. Гэты факт складана растлумачыць аб'ектыўнымі дэмаграфічнымі прычынамі.
Выбарчым правам у Беларусі валодаюць грамадзяне, якія дасягнулі 18-гадовага веку, за выняткам недзеяздольных і зняволеных. У Гомелі дзель насельніцтва да 18 гадоў паводле звестак Белстата складае 17%, у той час як у рэгіёнах — больш за 19%. Улік дэмаграфічных звестак кажа аб тым, што ў рэгіёнах у выбарчыя спісы ўключаны як мінімум 1% "мёртвых душ". Затое ў выбарчых спісах абласнога цэнтра і прадмесця ў лік выбаршчыкаў не ўключана больш за 7% фактычнага насельніцтва.