Саакашвілі заклікаў Пашыняна выйсці з СНД і АДКБ і падаць заяўку ў ЕЗ і NATO
- 18.10.2023, 19:31
Экс-прэзідэнт Грузіі заклікаў таксама «пайсці ва-банк», каб на Каўказе былі адкрытыя межы.
Былы прэзідэнт Грузіі, які знаходзіцца ў грузінскай турме грамадзянін Украіны Міхаіл Саакашвілі папярэдзіў прэм'ер-міністра Арменіі Нікола Пашыняна, што ён з'яўляецца «крэўным ворагам» для прэзідэнта краіны-агрэсаркі Расеі Уладзіміра Пуціна. Меркаванне грузінскага палітыка апублікаванае 17 кастрычніка на яго старонцы ў Facebook.
«Мяне вельмі хвалюе лёс нашага рэгіёна і Арменіі. Грунтуючыся на сваім досведзе дачыненняў з Расеяй і з Пуціным, які нядаўна на саміце СНД практычна абвінаваціў мяне ў развале гэтай арганізацыі, дазволю даць вам некалькі парад. Вы дашлі да ўлады ў выніку народных выступаў, гэта значыць, па тэрміналогіі Пуціна - каляровай рэвалюцыі, і паверце мне, як бы вы яго не задобрывалі, кляліся ў вернасці, ён ніколі бы вас не прабачыў і не прабачыць. Пагатоў пасля вашых нядаўніх заяў, палітычных хадоў і асабліва ратыфікацыі Рымскага статуту - ён ваш крэўны вораг і будзе зрынаць вас усімі наяўнымі ў яго на руках магчымасцямі», - сказана ў допісе.
Экс-прэзідэнт Грузіі мяркуе, што Пуцін будзе выкарыстоўваць супраць Арменіі «ўнутраныя беспарадкі, заахвочванне ваенных дзеянняў, будзе душыць эканамічна і ўжываць увесь арсенал гібрыднай вайны».
«Вам трэба памятаць, што часу ў вас вельмі мала. Пасля прыходу да ўлады вы не змаглі ці не правялі фундаментальных рэформаў, ваш цяперашні дзяржапарат - гэта рэальна пятая калона Крамля. Вы запазніліся з еўрапейскай інтэграцыяй. Як гэта ні складана для вас, але апошнія падзеі вакол Арменіі даюць нашаму рэгіёну новы шанц. Праз некаторы час мы можам жыць як тры балтыйскія краіны - з адкрытымі межамі, ствараць цэлую сістэму лагістычных, фінансавых, энэргетычных хабаў, выкарыстоўваючы перавагі кожнай з нашай тройкі. Але для гэтага вы павінны спяшацца і адкінуць усякае ваганне, пайсці ва-банк», - заявіў Саакашвілі.
На яго думку, Пашыняну трэба «запатрабаваць неадкладнага вывядзення [з Арменіі] расейскай ваёсковай базы, выйсці з СНД, АДКБ, мытнага саюза і падаць заяўку ў Еўрапейскі Звяз і ў NATO».
«Нарэшце, Вы павінны адкрыта заявіць і неадкладна падпісаць мірную дамову з Азербайджанам і тым самым адкрыць дарогу для фундаментальных зменаў ва ўнутранай і замежнай палітыцы Арменіі. Вам не займаць асабістай мужнасці і палітычнай смеласці і спадзяюся, вы не дазволіце Пуціну знішчыць вас і заадно разбурыць вашу краіну і канчаткова падарваць наш рэгіён», - падкрэсліў Саакашвілі.
З яго слоў, «навіслая небяспека вельмі рэальная і патрабуе неадкладных дзеянняў».
«Спадзяюся, на гэты раз вы не будзеце марудзіць», – пракаментаваў сітуацыю грузінскі палітык.