Вакарчук пракаментаваў прысуд беларускай спявачцы, якая была арыштаваная за выкананне ягонай песні

• 25.01.2023, 17:55

Лідар «Акіяна Эльзы» падтрымаў Мерыем Герасіменку.

Беларусь жыве ў оруэлаўскай рэчаіснасці. Пра гэта лідар украінскага гурта «Акіян Эльзы» Святаслаў Вакарчук заявіў у эфіры канала «1+1». Украінскі музыка падтрымаў беларускую спявачку Мерыем Герасіменку, арыштаваную за выкананне яго песні «Oбійми».

- У гэтым выпадку гэта тыповыя рэпрэсіўныя метады. Мне вельмі шкада гэтую прыгожую дзяўчыну, якая, спадзяюся, знойдзе сілы і з годнасцю пройдзе гэтае выпрабаванне. (...) Хочацца і ёй, і ўсім астатнім, абсалютна незаконна асуджаным, альбо тым, хто чакае суда - пажадаць сіл і мужнасці. Мы, безумоўна, падтрымліваем іх маральна ў гэтым», - сказаў Вакарчук.

Музыка падкрэсліў, што спачатку прычынай затрымання Герасіменкі беларускія прапагандысты назвалі выкананне ёю песні на ўкраінскай мове, а потым заявілі, што прычына палягала ў тым, што спявачка перадала сродкі ва ўкраінскае войска:

- Я не магу зразумець, чаму данаціць украінскаму войску - гэта парушэнне грамадскага парадку...гэта як у кнізе Оруэла. Гэта зусім іншы свет, з якога, дзякуй Богу, мы, украінцы, адышлі ў 1991 годзе і, вядома, ніколі не павернемся. Цаной страшных ахвяраў, цаной нашых намаганняў, мы плацім, каб не вяртацца да гэтага кашмару, у якім знаходзіцца Беларусь і Расея», - адзначыў спявак.

Прысуды Мерыем Герасіменцы і іншым беларускага палітвязням лідар «Акіяна Эльзы» назваў «недарэчнымі».

«Мы тут здзіўляемся такім абсалютна недарэчным для нас, для звычайных людзей, прысудам, і там (у Беларусі - заўвага рэд.) людзі ў гэтым жывуць», - сказаў Вакарчук.

Як пісаў сайт Charter97.org, спявачку Мерыем Герасіменку, якая выканала ўкраінскую песню, прысудзілі да трох гадоў «хатняй хіміі».