Гішпанія і Партугалія далучыліся да кааліцыі па пастаўках Украіне танкаў Leopard-2

• 25.01.2023, 15:06

Стала вядома, колькі танкаў рыхтуюцца адправіць з Іберыйскага паўвострава.

Гішпанія гатовая далучыцца да танкавага альянсу па Leopard 2 для Украіны пасля пастановы на еўрапейскім узроўні. Мадрыд можа паставіць Кіеву 53 танкі нямецкага ўзору.

Пра гэта паведамляе El Mundo.

Паводле інфармацыі газеты, усяго Гішпанія набыла ў Нямеччыне ў 1998 годзе 108 танкаў Leopard 2. Цяпер машыны захоўваюцца ў лагістычным цэнтры Сарагоса. Пры гэтым Мадрыд гатовы перадаць Украіне 53 адзінкі танкаў.

Аднак паведамляецца, што толькі 20 з іх знаходзяцца ў добрым стане, іншыя маюць патрэбу ў «адпаведным абслугоўванні для ўсякай машыны, якая знаходзіцца на захоўванні».

Партугалія таксама рыхтуецца адправіць чатыры танкі Leopard 2 ва Украіну, пасля таго, як Нямеччына, нарэшце, саступіла ціску з боку хаўруснікаў і дала зялёнае святло на адпраўку гэтых танкаў.

Пра гэта паведамляе партугальскае выданне Correio da Manhã.

Паводле інфармацыі крыніц выдання, Партугалія мае 37 такіх бронемашын, 12 з якіх цалкам спраўныя.

Як паведамляў сайт, сёння Нямеччына афіцыйна дазволіла перадачу Украіне танкаў Leopard 2.