ЗША адключылі ад даляраў апошні буйны расейскі дзяржбанк
- 24.01.2023, 20:48
Гэта можа паставіць пад пагрозу мільярды даляраў сыравінавага даходу РФ.
Апошні з буйных расейскіх дзяржбанкаў пазбавіўся доступу да карэспандэнцкіх рахункаў ЗША, без якіх немагчымыя аперацыі ў далярах.
Газпрамбанк – трэці памерам актываў у Расеі і адзіны з вялікіх дзяржаўных банкаў, які захоўвае доступ да міжнароднай аплатнай сістэмы SWIFT, - з 27 студзеня спыняе транспамежныя пераводы ў далярах, паведаміла прэс-служба банка ў аўторак.
Прычына - у закрыцці карэспандэнцкіх рахункаў амерыканскімі JPMorgan Chase Bank і Bank of New York Mellon (BoNY), тлумачыць ГПБ. Банк просіць кліентаў не выкарыстоўваць яго сэрвісы для даляравых пераводаў, а таксама запэўнівае, што і фізічныя і юрыдычныя асобы захаваюць "бесперапынны доступ да сваіх грашовых сродкаў".
ГПБ працягне пераводы ў іншых валютах, указвае яго прэс-служба. “Гэта не новыя санкцыі, не адключэнне ад SWIFT, не замарозка рахункаў. Проста названыя амерыканскія банкі спыняць з 27 студзеня абслугоўваць нашы карэспандэнцкія рахункі і ўсё. Гэта робяць яны, а не мы, мы нічога не закрываем”, - сказала Frank RG крыніца, блізкая да кіраўніцтва банка.
З лета расейскія банкі масава атрымлівалі лісты ад амерыканскіх контрагентаў, у тым ліку JP Morgan і Сitigroup, аб закрыцці даляравых карэспандэнцкіх рахункаў. У выніку да канца жніўня ў краіне амаль не засталося банкаў, якія захоўваюць доступ да галоўнай разліковай валюты свету, скардзілася старшыня камітэта Асацыяцыі банкаў Расеі ў рызыках Алена Букіна.
Для ГПБ, які стаў хабам для разлікаў за газ, банкі ЗША зрабілі выключэнне, разам са структурамі Маскоўскай біржы, адключэнне якіх прывяло б да спынення даляравых таргоў у Расеі.
Але зараз “публічныя санкцыі” закранулі і ГПБ. А гэта можа паставіць пад пагрозу мільярды даляраў сыравіннай выручкі, якую расейскія кампаніі атрымлівалі ў 2022 годзе.
Дэ-факта Газпромбанк стаў новым цэнтрабанкам Расеі, пісаў раней галоўны эканаміст IIF Робін Брукс. У той час як Банк Расеі пад кіраваннем Эльвіры Набіулінай ліквідаваны як суб'ект сусветнай фінансавай сістэмы, яго рахункі арыштаваныя, а правесці валютныя ўгоды няма магчымасці нават на Маскоўскай біржы, Газпромбанк акумуляваў на сваіх рахунках лішак валюты за нафту і газ.