Заробак Паліны Шарэнды-Панасюк у калоніі - 28 капеек
- 10.01.2023, 16:27
Палітзняволеную пазбавілі самых базавых рэчаў.
У жаночай калоніі №24 у Гомельскай вобласці працягваюць здзекавацца з актывісткі грамадзянскай кампаніі «Еўрапейская Беларусь» Паліны Шарэнды-Панасюк. Палітзняволеную пазбавілі самых базавых рэчаў і змясцілі ў камеру, ёй плацяць здзеклівы заробак, паведамляе «Белсат»,
«Нам удалося атрымаць выпіску з рахунку Паліны. З гэтай ведамасці відаць, колькі грошай мая жонка можа марнаваць на тавары. Мы бачым, што ў краме за месяц ёй можна набываць тавары толькі на 30 рублёў. Я думаю, гэта здзек з Паліны, за гэтыя грошы можна набыць толькі сродкі гігіены, а купіць прадукты проста немагчыма. Гэта яшчэ адно катаванне Паліны.
Таксама мы бачым, што за апошнія некалькі месяцаў яе заробак максімальна складаў 61 капейку. Было і 28 капеек. Хутчэй за ўсё, яе прыцягваюць да работ па ўборцы на кухні і камеры і налічваюць такі здзеклівы заробак», – кажа муж Паліны Андрэй Шарэнда.
Ён адзначае, што адміністрацыя калоніі робіць усё, каб умовы для яго жонкі былі максімальна невыносныя.
«Акрамя таго мы ўбачым пазнаку Д18 - гэтым кодам у калоніі абазначаюць вязняў, схільных да ўцёкаў, захопу закладнікаў і нападу на супрацоўнікаў калоніі. Гэта значыць, яны ўважаюць маю жонку небяспечным злачынцам. Таксама мы бачым, што Паліна пазначаная, як злосная парушальніца рэжыму, і што яна сапраўды знаходзіцца ў ПКТ, раней пацверджання гэтаму не было, цяпер яно ёсць. Калонія працягвае ціснуць на Паліну, не прапускаць лісты да яе. Зноў не прынялі вялікую рэчавую перадачу, хаця яна абавязковая да прыняцця і ў ёй нельга адмовіць. Гэта пасылка на 50 кілаграм, але зноў у нас адмова», - адзначае Андрэй Шарэнда.
Нагадаем, што Паліна знаходзіцца ў жаночай папраўчай калоніі №24 (Зарэчча), куды яе перавялі з СІЗА №3 Гомеля. 7 красавіка 2021 года Паліне дадалі яшчэ 1 год калоніі да асноўнага тэрміну. Такі прысуд прызначыў суддзя суда Чыгуначнага раёна Гомеля Мікалай Крупадзёраў. Паліну судзілі ў закрытым рэжыме за нібыта парушэнне ч.2 арт.411 КК («Злоснае непадпарадкаванне патрабаванням адміністрацыі папраўчай установы»).
У няволі Паліна застаецца ўжо больш за два гады, яе затрымалі 3 студзеня 2021 года. Летась суддзя Яўген Брэган асудзіў Паліну на 2 гады зняволення па трох артыкулах Крымінальнага кодэкса: арт.368 («Знявага прэзідэнта»), арт.369 («Знявага прадстаўніка ўлады») і арт.364 («Гвалт або пагроза гвалту ў дачыненні да супрацоўніка органаў унутраных спраў»).
Супраць Андрэя Шарэнды таксама завялі некалькі крымінальных спраў, але яму ўдалося збегчы з Беларусі. Сям'ю пазбавілі арэнднага жылля.