Праз санкцыі «Гомельскі хімзавод» пазбавіўся 95% экспарту
- 10.01.2023, 11:56
Прадукцыю даводзіцца збываць на стратных кірунках.
Праз напад Расеі на Украіну ў сакавіку мінулага года "Гомельскі хімзавод" пазбавіўся 95% экспарту. У сувязі з гэтым прадпрыемства пастанавіла падвысіць кошты на ўнутраным рынку.
Пра гэта «Вестнику «Белнафтахіма» распавёў дырэктар прадпрыемства Дзмітрый Чарнякоў.
«Не сакрэт, што ў пачатку сакавіка мы нечакана пазбавіліся 95% экспарту, які складаў 70% усяго даходу, і засталіся са стратным унутраным рынкам. Рэч у тым, на працягу пяці гадоў прадпрыемства не падымала кошты ўгнаенняў унутры краіны, бо ўдавалася перакрываць страты на айчынным рынку даходамі ад экспарту», - сказаў ён.
Са слоў дырэктара, прадпрыемству давялося эканоміць на ўсім. Акрамя таго, яно сканцэнтравала намаганні на пераарыентацыі экспарту, які складаў 360-430 тысяч тон штогод.
Чарнякоў таксама адзначыў, што ў «Гомельскі хімзавод» захаваў прысутнасць у Еўропе. Для гэтага давялося прыбраць з NPK-угнаенняў калійны складнік, які апынуўся пад санкцыямі.
«Пастаўкі мінеральных угнаенняў у Азію і Паўднёвую Амерыку для нас стратныя з-за істотных выдаткаў на дастаўку, бо лагістычнае плячо ад Гомеля да іншага кантынента вялізнае. Тым не менш адкрылі новы рынак - Лібію, адгружалі прадукцыю ў КНР і іншыя краіны», - дадаў дырэктар.