На поўдні Украіны горача: на беразе Дняпра ідуць лютыя баі

• 10.01.2023, 11:54

УСУ знішчылі дзве расейскія ўстаноўкі С-300 і некалькі груп акупантаў.

У Херсонскай вобласці ідуць баі. Мясцовыя Telegram-каналы паведамляюць пра артдуэлі і аўтаматныя чэргі на беразе Дняпра. СМІ паведамляюць аб знішчэнні групы варожых дэсантнікаў і агнявой паразе дзвюх установак С-300, з якіх расейцы абстрэльвалі ўкраінскія пазіцыі.

Спачатку расейцы ўдарылі па Херсоне, пасля чаго УСУ адказалі дакладным ударам па двух агнявых пазіцыях расейцаў на левабярэжжы.

Інфармацыю аб трапляннях УСУ па варожых аб'ектах удакладніў канал "Мікалаеўскі Ванёк", які супрацоўнічае з Сіламі абароны поўдня.

Паводле яго інфармацыі, а 23:00 9 студзеня ўкраінскія ракетчыкі патрапілі па тэрыторыі былога завода ў с. Шырокае Скадоўскага раёна, дзе расейцы размясцілі дзве свае ўстаноўкі С-300, перапрацаваныя пад клас «зямля - зямля». Дакладныя наступствы ўдару высвятляюцца, аднак ужо вядома аб тым, што варожыя камандзіры ў гэтай зоне - разлютаваныя.

Акрамя таго, уночы была знішчаная агнявая пазіцыя супраціўніка ў раёне Голай Прыстані.

У самім жа Херсоне гараджане маглі чуць аўтаматныя чэргі бліжэй да берага Дняпра: паводле інфармацыі канала, украінскія абаронцы ліквідавалі варожую дыверсійна-выведвальную групу, якая складалася з прадстаўнікоў паветрана-дэсантных войскаў РФ. Удалося захапіць трафеі.

Як пісаў сайт Charter97.org, асноўныя баі на поўдні ідуць за Кінбурнскую касу і астравы ў дэльце Дняпра. Для УСУ, так і для акупантаў гэтая зона - стратэгічна важная.