Столтэнберг адказаў на заяўку Украіны датычна ўдзелу ў NATO

• 30.09.2022, 19:10

Украіна падае заяўку на сяброўства ў NATO ў паскораным парадку.

Генеральны сакратар Паўночнаатлантычнага альянсу Енс Столтэнберг адказаў на заяўку Украіны датычна ўдзелу ў NATO.

Пра гэта ён заявіў падчас брыфінгу.

«Пастанову пра сяброўства будуць прымаць усе 30 хаўруснікаў. Пастанова прымацца кансэнсусам», – заявіў Столтэнберг.

Генеральны сакратар NATO таксама зазначыў, што цяпер Альянс засяроджаны на тым, каб наўпрост падтрымаць Украіну і дапамагаць абараняцца ад расейскага ўварвання. Гэта цяпер асноўная мэта хаўруснікаў у NATO.

Сёння прэзідэнт Украіны Уладзімір Зяленскі пасля паседжання РНБА заявіў, што Украіна падае заяўку на сяброўства ў NATO ў паскораным парадку. Плануецца, што гэта адбудзецца паводле сцэнара Швэцыі і Фінляндыі без узгодненага Плана дзеянняў да ўступлення.

Таксама Зяленскі прапанаваў даць Украіне гарантыі бяспекі, пакуль чальцы NATO будуць шукаць кансэнсус.

Варта адзначыць, што ў 2019 годзе Украіна замацавала ў Канстытуцыі курс на сяброўства ў ЕЗ і NATO. Гэта стала стратэгічнай мэтай дзяржавы.