Данія апублікавала відэа выхаду газу з пашкоджаных газаправодаў Nord Stream
- 27.09.2022, 18:11
Першы выцек знайшоў лётчык F-16 дацкіх ВПС.
Міністэрства абароны Даніі апублікавала відэа выхаду газу з пашкоджаных газаправодаў «Паўночны струмень» і «Паўночны струмень – 2». Першы выцек знайшоў лётчык F-16 дацкіх ВПС, гаворыцца ў суправаджальным паведамленні.
Тэрыторыя вакол выцекаў узятая пад кантроль вайсковых. Фрэгат Absalon і судна Gunnar Thorson для барацьбы з забруджваннем знаходзяцца ў шляху для правядзення маніторынгу вады.
Нагадаем, учора Данія, а сёння і Швэцыя заявілі аб наяўнасці выцекаў з газаправодаў «Паўночны струмень» і «Паўночны струмень – 2». Яны знойдзеныя ля вострава Борнхольм. Са звестак Швэдскай марской адміністрацыі, газаправоды пашкоджаныя ў трох месцах.