У Шчучыне дом узляцеў у паветра пасля таго, як гаспадар наважыў папіць гарбаты

• 20.09.2022, 19:32

Фатафакт.

Раніцай 20 верасня ратавальнікі места Шчучына, што ў Гарадзенскай вобласці, атрымалі інфармацыю аб выбуху газавага балона ў жылым доме на вуліцы Сельскай, паведамляе mchs.gov.by.

Калі ратавальнікі прыехалі на месца здарэння, яны ўбачылі, што выбухам была разбураная веранда, пашкоджаны дах, сцены, перакрыцце і маёмасць у доме. 28-гадовы гаспадар дома атрымаў апёкі. Яго адправілі ў рэанімацыю шпіталю, стан цяжкі.

А пачалося з таго, што ён паставіў на газавую пліту разагравацца імбрык, а праз некалькі сэкундаў адбыўся выбух.

Асноўная версія надзвычайнага здарэння - парушэнне правілаў эксплуатацыі газавых прылад і агрэгатаў.