Беларускі рубель ужо трэці дзень запар таннее да асноўных валют
- 1.07.2022, 16:19
Даляр і еўра паказалі максімальны рост за тры тыдні.
Беларускі рубель ужо трэці дзень запар таннее да даляра і еўра адначасова, піша select.by. Кошт кошыка валют павысіўся на 0,14%.
З пачатку тыдня кошык валют падаражэў да беларускага рубля ўжо на 2,29%. За чэрвень беларускі рубель патаннеў да кошыка валют на 8,44%.
Курс даляра падняўся на 0,0068 BYN да 2,5731 BYN/USD да максімуму за 23 дні.
Амерыканец умацоўваецца трэці дзень. Яго кошт за гэты час з мінімуму за 34 дні падняўся на 0,0510 BYN да максімуму больш чым за тры тыдні.
Курс еўра вырас на 0,0113 BYN да 2,6818 BYN/EUR да максімуму за 21 дзень.
Еўра даражэе ўжо пяты дзень запар. Два дні ён умацоўваўся самотна, а потым тры дні разам з далярам, але сумарна за гэты час кошт еўра падняўся ўсяго на 0,0215 BYN.
Курс расейскага рубля апусціўся толькі на 0,0005 BYN да 4,8860 BYN/100 RUB. Гэта вельмі слабае зніжэнне пасля ўчорашняга адразу на 0,0840 BYN.