УСУ знішчылі генерала авіяцыі РФ, які бамбаваў украінскія гарады

• 23.05.2022, 16:42

Што пра яго вядома.

Байцы Узброеных сіл Украіны ў Луганскай вобласці збілі самалёт расейскіх акупантаў Су-25, за штурвалам якога знаходзіўся генерал-маёр РФ Канамат Баташоў, піша «Главред».

Расейскі акупант быў ліквідаваны ў выніку траплення Stinger у самалёт РФ у раёне Папаснай.

Каментатары ў расейскіх сацыяльных сетках прызнаюць, што Баташоў быў знішчаны пасля таго, як скідаў некіравальныя набоі на мірныя ўкраінскія гарады.

«Першы заход НАР-ы (некіравальная авіяцыйная ракета, – рэд.), другі бомбы. Стынгер на выхадзе з атакі, выбух у паветры», – распавядаюць падрабязнасці знішчэння генерала-рашыста.

Не выключана, што Баташоў стаў наймітам у ПВК Вагнер. Пра наяўнасць у гэтага ПВК уласнай штурмавой авіяцыі паведамлялі расейскія Telegram-каналы.

«Пагалоскі пра авіяцыю над Папаснай з нетрадыцыйнай для ПКС Расеі і ВПС Украіны маркіроўкай усё ж з'явіліся. У свеце цяпер трэнд на каршэрынг, аркестр ужо даўно карыстаецца плейншэрынгам, хто ў тэме, той ведае», – пісалі расСМІ.

Што вядома пра скандальнага генерала-рашыста

Канамат Баташоў - генерал-маёр Узброеных Сіл Расейскай Федэрацыі, 1959 г.н.

Быў звольнены з шэрагаў войска яшчэ ў 2013 годзе. Баташоў з'яўляўся фігурантам крымінальнай справы. Яму інкрымінавалі знішчэнне баявога самалёта Су-27.

Паводле інфармацыі Новай газеты Баташоў у 2012 годзе прыбыў у вайсковую часць 23326-2, дзе папрасіў яе камандзіра Яўгена Алейніка, свайго таварыша, «пакатаць» на Су-27УБ. Баташоў сеў у крэсла другога пілота і разам з Алейнікам яны здзейснілі некалькі манеўраў у паветры. Аднак Баташоў захацеў выканаць фігуру вышэйшага пілатажу «звон», пасля чаго пілоты страцілі кантроль над машынай і катапультаваліся. Іх абодвух звольнілі з шэрагаў войска.

Да гэтага Баташоў камандаваў авіябазай «Балтымар» у Варонежы. Раней там базіраваліся бамбавікі Су-24 і перахопнікі МіГ-25. Цяпер - бамбавікі Су-34.