Навукоўцы расказалі, як шлюб уплывае на працягласць жыцця

• 23.05.2022, 9:35

Нечаканая выснова кардыёлагаў.

На навуковым кангрэсе Еўрапейскага таварыства кардыёлагаў (ESC) «Сардэчная недастатковасць 2022» анансавалі новае даследаванне ў сферы сардэчнага здароўя. Згодна з ім, бясшлюбныя пацыенты з сардэчнай недастатковасцю здаюцца менш упэўненымі ў кіраванні сваім станам і больш абмежаванымі ў сацыяльным плане ў параўнанні з жанатымі або замужнімі, піша «Папулярная механіка».

Гэтыя адрозненні, магчыма, спрыялі горшаму доўгатэрміноваму выжыванню, якое назіраецца ў пазашлюбных пацыентаў.

Сацыяльная падтрымка дапамагае людзям справіцца з хранічнымі захворваннямі. «У нашым даследаванні пазашлюбныя пацыенты дэманстравалі менш сацыяльных узаемадзеянняў, чым пацыенты ў шлюбе. Першым проста бракавала ўпэўненасці ў тым, што яны могуць справіцца з сардэчнай недастатковасцю. Мы вывучаем, ці могуць гэтыя фактары таксама часткова растлумачыць сувязь з выжываннем», - падзяліўся аўтар даследавання доктар Фабіян Керваген з Комплекснага цэнтра сардэчнай недастатковасці пры універсітэцкай бальніцы Вюрцбурга, Нямеччына.

У даследаванне ўключылі 1022 пацыенты, шпіталізаваных у перыяд з 2004 да 2007 года з сардэчнай недастатковасцю. З 1008 пацыентаў, якія падалі інфармацыю аб сямейным становішчы, 633 (63%) былі жанатыя і 375 (37%) не былі ў шлюбе. За 10 гадоў назірання памерла 679 (67 працэнтаў) хворых. Адсутнасць шлюбу ў параўнанні з жанатымі была звязана з больш высокай рызыкай смерці ад усіх прычын і смерці ад сардэчна-сасудзістых захворванняў.