Дзядуля ў Чарнігаве са стрэльбы дапамог «прызямліць» знішчальнік ворага

• 20.05.2022, 11:30

У смеласці няма ўзросту.

Такія гісторыі яшчэ раз даказваюць, што ў Расеі няма ніякіх шанцаў перамагчы ў вайне супраць Украіны.

Пра Уладзіміра Фёдаравіча з Чарнігава расказалі ў ГНСУ. Адзначылі, што мужчына прыклад таго, што для смеласці няма ніякіх узроставых абмежаванняў.

Мужчына расказвае, што пачуў у небе гул. Ён адразу ж схапіўся за стрэльбу. І хаця яна разлічаная на крыху іншую здабычу, Уладзіміра Фёдаравіча гэта не спыніла ні на хвіліну.

«Я сваёй «клюшкай», а хлопцы - сваімі. І яно, падла, упала», - распавёў ён.

Ніхто не можа дакладна сказаць, дзякуючы каму ўдалося «прызямліць» варожы знішчальнік. Але можна без сумневу сказаць, што гэты дзядуля сапраўды прыклаўся да таго, каб у войску Расеі было менш на адзін самалёт.

Як сапраўдны паляўнічы Уладзімір Фёдаравіч пакінуў сабе трафей. Цяпер у яго ў гаражы стаіць абломак таго ж расейскага знішчальніка, які збілі ў Чарнігаве.

Адзначым, што самалёт акупатнаў удалося збіць 5 сакавіка. Ім выявіўся расейскі бамбавік Су-34. Падчас «прызямлення» двум пілотам удалося катапультавацца. Аднак адзін з іх папоўніў шэрагі «двухсотых», а другі - Аляксандр Краснаярцаў - стаў палонным. Перад тым ён з пісталета забіў аднаго цывільнага, які спрабаваў яго злавіць.

Дзядуля таксама расказаў, што ў яго падвале хаваліся ад атак суседзі. І як толькі ён паказаў дзіцячы малюнак на дзвярах, стрымліваць слёз ён не змог. Мужчына адвярнуўся ад камеры і папрасіў прабачэння за тое, што эмоцыі ўзялі верх.

Яго спыталі, ці пайшоў ён ваяваць, калі б не было абмежаванняў па ўзросце. На гэта мужчына без сумневу адказаў: «Я бы сёння пайшоў пешшу! На карачках палез бы!»

Гэты смелы дзядуля паказаў, што няма правільнага ўзросту, каб бараніць сваю дзяржаву ад акупантаў. І калі няма магчымасці далучыцца да шэрагаў УСУ, то можна біць па ворагу ўсімі магчымымі спосабамі. У тым ліку і дапамагаючы нашым вайскоўцам і валанцёрам.