Футбаліст нацыянальнай каманды Беларусі: Разам мы зможам спыніць вайну і абараніць Украіну!
- 19.05.2022, 12:28
Калі нас тысячы ці дзясяткі тысяч, то гэта сапраўдная сіла.
Футбаліст зборнай Беларусі Мікалай Золатаў падпісаў Антываенную дэкларацыю спартоўцаў і заклікаў далучыцца іншых гульцоў. Пра гэта паведамляе Беларускі фонд спартовай салідарнасці.
- Антываенная дэкларацыя павінна стаць агульным голасам усіх спартоўцаў, якія сапраўды супраць вайны, якія хочуць спыніць смерці, вар'яцтва і жах, якія прыйшлі ва Украіну. Я заклікаю ўсіх сяброў і калег-спартоўцаў далучыцца, - цытуе БФСС Золатава. — Калі мы робім нешта важнае ў адзіночку, гэта годнае павагі, а калі разам, калі нас тысячы ці дзясяткі тысяч, то гэта сапраўдная сіла! Разам мы зможам спыніць вайну і абараніць Украіну!
Нагадаем, што Золатаў да пачатку вайны выступаў за ФК «Колас» з Кіеўскай вобласці. Цяпер абаронца гуляе за «Бастыю» з другога дывізіёна чэмпіянату Францыі і ўжо паспеў дэбютаваць за новую каманду.