Двое беларусаў спрабавалі завезці ў Польшчу тысячу пачкаў кантрабандных цыгарэтаў

• 18.05.2022, 18:44

Фотафакт.

Беларусы спрабавалі на двух аўтамабілях правезці амаль тысячу пачкаў кантрабандных цыгарэтаў у Польшчу. Ім пагражаюць крымінальныя артыкулы і вялікія штрафы. Пра гэта паведаміла Падляшская мытна-падатковая служба.

Супрацоўнікі Падляшскай мытна-падатковай службы непадалёк ад польска-беларускай мяжы спынілі два аўтамабілі для праверкі. Машыны былі з беларускімі рэгістрацыйнымі нумарамі. Падчас дэталёвага агляду аўто высветлілася, што ў іх знаходзіцца дзясятак схованак з кантрабанднымі цыгарэтамі.

У машыне Opel, якой кіраваў 33-гадовы беларус, кантрабанду схавалі ў багажніку, пад заднімі сядзеннямі і ў тунэлі вагара пераключэння перадачаў.

42-гадовы кіроўца Mercedes схаваў кантрабандныя цыгарэты пад бамперам, у алейным паддоне і калектары рухавіка.

Усяго ў дзвюх машынах супрацоўнікі Падляшскай мытна-падатковай службы знайшлі амаль 1000 пачкаў беларускіх цыгарэтаў. У адносінах да кіроўцаў распачалі крымінальныя справы. Тавар быў выняты, кантрабандыстам пагражаюць вялікія штрафы.